Ukrainada ilk hasta koronavirustan tüzeldi, dep bildirdi Ukraina prezidenti Volodımır Zelenskıy.
Bu aqta o, içtimaiy ağlarda bildirdi.
«Quvançlı haberimiz bar. Çernivtsi şeerinden hastanıñ tekrar koronavirus talili yapıldı. Menfiy netice çıqtı. Resmiy şekilde bildiremiz – Ukrainada koronavirustan tüzelgen birinci insan bar. Bunı onı hastahaneden çıqaralar, ve o, evine qayta», – dedi Zelenskıy.
Onıñ bildirgenine köre, Ukraina Milliy ilimler akademiyasınıñ molekulâr biologiya institutı azırlağan ekspress-testlerniñ birinci partiyası alındı.
«Aytmaq isteyim ki, yaqın 48 saatta Ukrainanıñ bütün köşelerine yollanacaq 10 million laborator testiniñ Qıtaydan Ukrainağa kelmesini bekleymiz. Aqcigerniñ suniy avalandırıluvını yapqan 10 apparat kelecek. Ukraina aphanelerine berilecek million maska. Ekimler ve politsiya hadimleri içün 100 biñ yüksek seviyeli qoruv maskası. 400 biñ ekspress-test ve 10 biñ litr yuqunçsızlaştıruv madde. Er bir Ukraina vatandaşını şahsiy qoruv vastaları, ekspress-testler, yuqunçsızlaştırıcı ile temin etmek içün elimizden kelgenini yapacaqmız», – dep qayd etti Zelenskıy.
Martnıñ 3-nde Ukraina Sağlıq nazirligi Ukrainada COVID-19 qayd etilgen ilk hasta aqqında bildirdi. Bundan bir qaç kün ögüne er adam Çernivtsi şeerine koronavirus merkezlerinden biri olğan İtaliyadan qayttı.
Martnıñ 20-ne qadar Ukrainada 26 COVID-19 hastası qayd etildi. Üç kişi öldi.
