Ukraina prezidenti Volodımır Zelenskıy Türkiye prezidenti Recep Tayyip Erdoğannen Rusiye işğal etken Qırımda insan aqları bozuvlarını ve qırımtatar siyasiy mabüsleriniñ azat etilüvinde yardımnı muzakere etti. Bu aqta Ukraina prezidenti Kyivdeki brifingde bildirdi.
«Biz Donbastaki cenk, Qırım yarımadasınıñ ilhaqı, Qırımda insan aqlarınıñ bozuvları ve Rusiyeniñ regiondaki tecavuz siyaseti aqqında laf ettik. Bu meselelerde Türkiye baqışları bizim içün pek müim ola, Ankaranıñ adımları da müim. Ukraina, Qırımda ve Rusiyede qanunsız tutulğan Ukraina vatandaşlarınıñ, hususan qırımtatarlarnıñ azat etilüvinde Türkiye yardım etecegine ümüt ete», – dedi Zelenskıy.
Hatırlatamız, fevralniñ 3-nde Ukraina prezidenti Volodımır Zelenskıy ve Türkiye prezidenti Recep Tayyip Erdoğannıñ matbuat konferentsiyası keçirile.
Ukraina prezidenti Volodımır Zelenskıy 2019 senesi avgustnıñ 7-nde Türkiye prezidenti Recep Tayyip Erdoğannen Ankarada muzakere keçirgen edi. Olar Donbastaki cenk, Qırım ilhaqı ve yarımadada qırımtatarlarnıñ taqip etilüvi, em de iqtisadiy işbirligi ve yol ve ava limanlarını beraber quruv aqqında laf etti.
