Ukraina prezidenti Volodımır Zelenskıy Ukraina Milliy telükesizlik ve mudafaa şurasınıñ kâtibi vazifesine Oleksiy Danilovnıñ tayinlenmesine dair buyruqnı imzaladı. Bu aqta Azatlıq Radiosı bildire.
«Danilov Oleksiy Mâçeslavovıçnı Ukraina Milliy telükesizlik ve mudafaa şurasınıñ kâtibi olaraq tayinlemek», – dep aytıla fermanda.
Açıq menbalarda olğan malümatqa köre, Danilov zenaat boyunca veterinar ola. 1994-1997 seneleri Lugansknıñ şeer yolbaşçısı (şeer tarihında eñ genç) edi, 2005 senesi ise Lugansk vilâyetiniñ memuriyet yolbaşçısı oldı. Bundan soñ Danilov «Yuliya Tımoşenkonıñ blokundan» 5-inci çağırılış Ukraina halq deputatı edi.
MTMŞ sabıq yolbaşçısı Oleksandr Danılük sentâbrniñ 30-nda istifağa ariza berdi. «Bu añlı bir qarar edi, şimdi olğanlarğa ve şekillengen siyasetke esaslandım. Bazıları oynağan gizli oyunlar meni meraqladırmay», – dedi o.
MTMŞ memleketniñ milliy telükesizlik meselelerinen oğraşıp, Ukraina ükümetinden başlap bütün akimiyet organlarına emirler bere bile.
