Ukraina prezidenti Volodımır Zelenskıy avgustnıñ 24-nde Kyivde Ukraina Mustaqilligi künü munasebeti ile çıqışı vaqtında Ukraina devletçiligi künü yañı bayramınıñ tayin etilmesi aqqında ilân etti. Bunı Azatlıq Radiosı haber etti.
«Ukraina devletçiligi künü bayramını qayd etip başlaymız. Başlanğıç noqtasını Kyiv Rusi-Ukrainanıñ paytahtı Kyivniñ qurulğan yılını sayamız, bu da tesadüfen degil, çünki er şey bu şeerden başlandı», – dedi Zelenskıy.
Onıñ sözlerine köre, "devletçiligimizniñ peyda olmasını devletimizniñ çiçeklep başlağan künü - Kyiv Rusiniñ hristianlıqqa döndürüvi künü" qayd etecekmiz. Zelenskıy muvafıq fermannı imzaladı.
Ukraina em Qırımnıñ işğali meselesinde, em de Donbastaki cenkte suverenitetini ve topraq bütünligini qorumaq mecburiyetindedir, amma aynı zamanda "bir devlet olaraq" qalmağa devam ete. Bunı Ukraina Yuqarı Radasınıñ spikeri Dmıtro Razumkovnıñ Ukraina Mustaqilligi kününe bağışlanğan bildirüvinde aytıla.
Avgustnıñ 24-nde Ukraina Mustaqilliginiñ 30-ncı yıldönümini qayd ete.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
