Ukrayina prezidenti Volodımır Zelenskıy Türkiyeni Ukrayina ile munasebetlerde "ekili standartlardan" red etmege çağırdı.
"Bir taraftan Türkiye aracı kibidir ve müim adımlarnen Ukrayinağa destek bere, diger taraftan ise, misal olaraq, aynı zamanda turistik marşrutlarnıñ azırlanmasını köremiz. Mahsus Rusiye turizmi içün", - dedi Zelenskıy ERT televizionına.
Zelenskıy Türkiyeniñ areketlerini "adeletsiz" adlandırdı ve Turkiye ükümetini Ukrayina ile dostanen munasebetlerni qurmağan isteseler Rusiye turistleri ve "aqiqat" arasında saylav etmege çağırdı.
Türkiye Rusiyeniñ Ukrayinağa istilâsından soñ Kıyivni destekledi, amma Moskvağa qarşı sanktsiyalar qoymadı. Bundan ğayrı, Türkiye ükümeti Rusiyeden turistlerni celp etmek içün "yol haritasını" azırladı. Digerler arasında programma Rusiyede bulunğan Türkiye operatorlarına kredit destegini ve Rusiye turistleri içün eki uçaq şirketiniñ yaratılmasını közde tuta.
Bugün Türkiye prezidenti Recep Tayyip Erdoğan musulmanlanıñ Oraza bayramına bağışlanğan duadan soñ, Ukrayinadaki cenk turistik mevsimge menfiy tesir etmemek kerek, dep bildirdi. Ve Rusiye prezidenti Vladimir Putin bu yönelişte artıq oña destek vade etkenini qayd etti.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
