Ukraina prezidenti Volodımır Zelenskıy ABD prezidenti Donald Trump ile körüşken soñ Amerika liderinen Rusiye işğal etken Qırımnıñ kimge ait olğanını laf etkenini bildirdi.
«Daa laf ettik, ve bu pek meraqlı ikâye, Qırım aqqında. Andaki insanlar, laf etken tilleri, rusça laf etkenleri aqqında aytıldı. Men oña (Trumpqa – QA) bu bizim toprağımız, anda insanlar olğanını, bağ, til meselelerimiz yoq, dep añlattım. Devlet tilimiz – ukrain tili. Qırım ne qadar güzel, memleketimizniñ ne qadar büyük ve dülber qısmı olğanını tarif ettim. Mence, eşittim ki, o, (Trump – QA) bu bizim toprağımız olğanına ve onı qaytaracağımızğa razı oldı. Dey ki: «Ebet, çalışmaq kereksiñiz, sizge yardım etecekmiz», – dedi Zelenskıy «112 Ukraina» yayınlağan brifingde.
Zelenskıy matbuat vastaları ögünde çıqışta bulunğanda Trumpqa onıñ ilk vazifesi «topraqlarımız – Qırım ve Donbasnı – qaytarmaq» ola, dep ayttı. Buña cevap olaraq Amerika prezidenti «Ukraina Qırımnı Trump memuriyeti vaqtında degil, Obama vaqtında coydı», dep ayttı.
Bundan ğayrı, Trump, Zelenskıy Ukraina topraq bütünligi problemini Rusiye prezidenti Vladimir Putinnen al etmeli, dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
