Ukrayına prezidenti Volodımır Zelenskıy bildirgenine köre, o, ABD sabıq lideri Donald Trump ile körüşip, Ukrayına ve Rusiye arasında barışıq teklifini muzakere etmege azır. Bu aqta Fox News haber ete.
«Laf etip, onıñ barışıq formulasında olğan adımlarnı köstermege imkân bereyik», – dedi Zelenskıy.
Ukrayına lideri Trumpnen körüşmege azırmı sualine cevap bergen Ukrayına prezidenti bunı qayd etti: «Ebet, men azırım, azırım. Ebet. Barışıq planı olsa, mennen paylaşa bile. Rusiyege Donbas ve Qırımnı bersek, ebet, cenkni toqtata bilemiz. Mence, bizim memleketimiz böyle barışıq planına azır olmaycaq. Ve bu barışıq planı değil».
Zelenskıy NBC News içün intervyü berip, Trumpnı Ukrayınanı ziyaret etmege davet etti. Bu şekilde o, sabıq Amerika lideriniñ 2024 senesi saylavlarda tekrar saylansa, «Ukrayınadaki cenkni bir künde bitirir» degen laflarına cevap berdi.
Ukrayına devlet yolbaşçısı qayd etkenine köre, o, Trumpqa «24 daqqa içinde» «cenkni bitirip olamaycağını, çünki Rusiye diktatorı Vladimir Putinnen diplomatiya yapmaq imkânsız» dep añlata bile.
«Prezident Zelenskıynı pek ürmet etem, amma Ukrayınağa barmaqnıñ vaqtı degil, dep tüşünem», – dedi Amerika siyasetçisi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
