Rusiye BMT Telükesizlik Şurasınıñ Rusiyeniñ tecavuzı ile bağlı qararlarını blok etmesinden uzaqlaştırmalı ya da Birleşken Milletler Teşkilâtı özü dağılmalı. Bunı Ukrayina prezidenti Volodımır Zelenskıy aprelniñ 5-nde BMT Telükesizlik Şurasınıñ oturışından video konferentsiyası vastasınen iştirak etip ayttı.
"Bizim qarşımızda BMT Telükesizlik Şurasındaki veto aqqını ölüm aqqına çevirgen, şerniñ cezası qalmasına imkân bergen global telükesizlikniñ bütün mimarlığını sarsıtqan bir devlettir... Eger böyle devam etse, devletlerniñ er biri öz telükesizligini temin etmek içün halqara uquqqa, halqara institutsiyalarğa degil de, yalıñız silâ küçüne işana bilecek. BMT dağıtmaq mümkün olacaq. BMT-niñ qapatılmasına azırsızmı? Cevabıñız "yoq" olsa, siz şimdi areket etmelisiz, deral BMT Nizamnamesine quvet qaytarmalısız, BMT sistemasında islâatlar keçirmek kereksiñiz. İslâatlar öyle olmalı ki, veto aqqı ölüm aqqı olmamalı. Dünyanıñ bütün bölgeleri adaletli şekilde Telükesizilk Şurasında olmalı. Tecavuzcını deral barışıqqa mecburlamaq kerek", -dedi Ukrayina prezidenti.
Zelenskıy Rusiye arbiylerini ve olarğa Ukrayina toprağında arbiy cinayetler yapmağa emir bergenlerni "Nürnberg esanası"na beñzegen tribunalda mahkeme etmege çağırdı.
O, kelecek nesillerge telükesizilk çağırışlarına preventiv şekilde cevap bere bilgen "semereli BMT" bermek içün BMT-nı islâ etmege çağırdı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net/. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
