Yañı saylanğan Ukraina prezidenti Volodımır Zelenskıy aprelniñ 29-nda saba qorantasınen beraber Güvercinlik mahallesindeki (Bodrum, Türkiye – QA) beş yıldızlı musafirhaneden çıqıp, Ukrainağa Turkish Airlines ava şirketiniñ uçaq seferinen qayttı, dep bildire Anadolu haber agentligi.
Berilgen malümatqa köre, Zelenskıy tatil vaqtında yanında olğan Türkiye vatandaşlarınıñ qolunı sıqtı.
Daa soñra siyasetçi Milas-Bodrum ava limanına yol aldı, VIP terminalda onı Muğla valisi Esengül Civelek ve Milas kaymakamı Eren Arslan ozğardılar.
Zelenskıy Türkiyeden Ukrainağa Turkish Airlines ava şirketiniñ seferinen qayttı.
Agentlikniñ malümatına köre, yañı saylanğan Ukraina prezidenti Bodrum restoranlarından birinde qorantasınen beraber üyle yemegini aşadı.
«Zelenskıy restoran hadimlerinen şaqalaştı ve atta aşçınıñ yerini alıp, et qavurdı», – dep aytıla haberde.
Volodımır Zelenskıy Türkiyeniñ Bodrum şeerine balalarnen beraber «Veselo» («Şeñ» – QA) festivaline ketkenini Facebook saifesinde yazğan edi.
Merkeziy saylav komissiyasınıñ ilk malümatına köre, Ukraina prezidenti saylavlarında ğalebe qazanğan Zelenskıy iyünniñ 1-ne qadar Ukraina prezidenti vazifesine başlamalı.
