Ukrayina prezidenti Volodımır Zelenskıy Almaniya kantsleri Olaf Şolts ile laf etti. Bunı o, iyünniñ 8-nde bildirdi.
"Olaf Şolts ile telefondan laf ettim. Biz Ukrayinağa mudafaa desteginiñ arttırılmasını, global aşayt telükesizliginiñ temin etilmesini, Rusiye Federatsiyasınıñ arbiy esirler ile davranuvda halqara qaidelerge riayet etme meselesini muzakere ettik", - dedi o.
Zelenskıy, Almaniya kantsleri ile laqırdı vaqtında, Ukrayinanıñ Avropa Birligine integratsiyası içün qarar almanıñ müimligine diqqat çekkenini de bildirdi.
Olaf Şolts laqırdını şimdilik açıq izaatlamadı.
Almaniya kantsleri mayısnıñ 19-nda bildirdi ki, Rusiyeniñ keniş mıqyaslı istilâsına baqmadan, Ukrayinanıñ Avropa Birligine qoşulmaq istegi tez zamanda baqıla bilmez.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
