Ukrayina prezidenti Volodımır Zelenskıy yanvarniñ 15-nde saba Rusiyeniñ soñki ücümini izaatladı.
"Qışnıñ ortasında, ve rusiyeliler içün maqsat deñişmey: bizim energetikamız. Maqsadları arasında — insanlarnıñ normal yaşayışını temin etken gaz infrastrukturası ve energetik obyektler", — dep bildirdi siyasetçi içtimaiy ağlarında.
Zelenskıynıñ malümatına köre, Rusiye ordusı 40-tan ziyade raketa uçurtqan, olardan eñ azından 30-ı yoq etilgen. Onıñ aytqanına köre, ava mudafaasınıñ yardımınen energetik sistema çalışmağa devam ete.
"Amma daima ukrayin ava qalqanınıñ imkânlarını quvetleştirmek kerekmiz. Vashingtonda NATO sammitinde ve Ramştayn formatında ortaqlar, alâ daa tolusınen yerine ketirilmegen vadeler berdiler. Ukrayina içün telükesizlik kefaletlerinden biri ola bilecek ava mudafaası ve raketalarğa qarşı sistemalarnıñ istisalına litsenziya berüv aqqında da laf ettik, ve bu da kerçek ve yerine ketirilmeli", — dep yazdı prezident.
Zelenskıy ortaqlarğa Ukrayinağa yardımları içün teşekkür bildirdi, amma söz tek telükesizlik aqqında ketmey, dep qayd etti:
"Şimdi, Ukrayinanı qorçalap, Avropa ve umumen demokratik dünya cenkni işançlı ve devamlı toqtatıp olacaqmı yoqmı añlaşıla".
Rusiye ordusı yanvarniñ 15-nde saba Ukrayinağa qarşı nevbetteki büyük raketa ücümini yaptı. "Ukrenergo" operatorı bir qaç vilâyette fevqulâde söndürüvler aqqında bildirdi. Lviv vilâyetiniñ yolbaşçısı regiondaki kritik infrastruktura obyektlerine eki kere urulğanı aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
