Kelecek afta Ukrayinada mahsus "Cellâtlar kitabı"nıñ işletilmesi beklenile. Bu, Rusiye ordusından arbiy cinayetçiler aqqında tasdıqlanğan malümat toplanacaq malümat sistemasıdır. Bunı Ukrayina prezidenti Volodımır Zelenskıy bildirdi.
"Olarnıñ episi mıtlaqa mesüliyet taşıycağını defalarca qayd etken edim. Ve biz buña adım-adım yaqınlaşamız. Böyle bim malümat sistemasınıñ yaratılması artıq bir müddettir devam ete. Bu ukrayinlerge qarşı muayyen müthiş cinayetlerde suçlu olğan muayyen adamlar aqqında muayyen faktlar. Ve böyle "Cellâtlar kitabı" yalıñız arbiy cinayetlerniñ doğrudan-doğru icracılarnıñ - işğal ordunıñ askerleriniñ degil, em de olarnıñ komandanlarınıñ mesüliyetiniñ esaslarından ibarettir", - dedi Zelenskıy.
Martnıñ 2-nde Halqara ceza mahkemesiniñ Prokuror ofisi Ukrayinadaki arbiy cinayetlereniñ tahqiqi başlanğanını ilân etti.
Bir çoq delillerge baqmadan Rusiye arbiy cinayetler içün öz arbiyleriniñ mesüliyetini qabul etmey.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
