Ukrayina prezidenti Volodımır Zelenskıy yarımadanıñ işğalden azat etilmesi "Qırım platforması" sammitiniñ esas vazifesidir dep bildirdi. Onıñ sözlerine köre, Rusiye diger işğal etilgen topraqlardan keri çekilgende yapqanı kibi Qırımnıñ işğalden azat etilmesine de köz yuma bile.
"Qırımğa nasıl qaytacağımıznı añlaymız. Qaç adım atmaq kerek olğanımıznı bilemiz. Bunıñ ne qadar qıyın olğanını añlaymız. Bu qıyın vazife, amma biz bu yolnı köremiz", - dep bildirdi o.
"Qırım platformamız" ile bağlı ilk toplaşuvdan keçken bir yıl içinde ukrayin arbiyleri inanlmız şeyler yaptı. Ukrayina toprağımıznıñ azat etilmesi tesadüf olmağanını kösterdi. Er şey qazanılğan: bu adamlarımıznıñ qaramanlığı ve ortaqlarımıznıñ mudafaa destegi. Men bütün ortaqlarımızğa minnetdarım", - dep bildirdi o.
Zelenskıynıñ sözlerine köre, "Ukrayina quvetleri ögge kete. Ve bu eñ esasıdır. Biz areket etemiz, Rusiye zapt etilgen topraqlardan keri çekilgende ise buña köz yuma. Rusiye cemiyeti işğalcilerniñ Qırımdan ketmesine de köz yuma bile".
"Bir yıl içinde global stabillik yalıñız Ukrayinanıñ iştiragi ile ve Rusiyeniñ tecavuziy niyetleri yoq olğanda ola bilgenini isbatladıq. Qara deñizni Rusiye işğalcilerinden temizlegen soñ ve zahire koridorını çalıştırıp başlağan soñ dünya bazarında fiyatlar eksilgenini kördik", - dep bildirdi o.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Ukrayina Baş prokurorı Andriy Ko stin Qırımda 180-den çoq ukrayin siyasiy mabüsniñ tutulğanını bildirdi. 2022 senesi mart ayından başlap ise eñ az 370 kişi Rusiye ordusını "itibardan tüşürüv" içün memuriy mesüliyetke celp etilgen.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
