Ukraina prezidenti Volodımır Zelenskıy, bir yıl evelsi Keriç boğazı yanında tutulğan arbiy deñizci ve gemilerni Rusiye tarafından Ukrainağa qaytarılması aqqında şartsız añlaştı, dep bildirdi. Prezidentniñ aytqanına köre, bu aqta «telefonda» keliştiler.
«Bir de bir şartsız, telefonda deñizcilerimizni ve gemilerimizniñ qaytarıluvı aqqında añlaştım. Bir şey imzalamadım, bir söz bermedim. Amma bu vaziyette aqlı olğanımıznı bilemiz, şu sebepten oğlanlarımız qaytmaq kerek edi. Bunı yapqan er keske minnetdarım. Şartlar yoq», – dep ayttı o, Oçakivdeki gece brifinginde. Prezident, anda işğal etilgen Qırımdan qaytqan Ukraina arbiy gemilerini tebriklemege keldi.
Bazarertesi künü, noyabrniñ 18-nde, bir yıl evelsi Qara deñizde Keriç boğazı yanında zapt etilgen «Nikopol», «Berdânsk» ukrain katerleri ve «Yañı Qapu» buksiriniñ Rusiye tarafından qaytarıluv esnası kerçekleştirildi, dep bildirdi Ukraina Arbiy-deñiz quvetleriniñ komandanlığı. Bundan evel ukrain gemileriniñ Ukrainağa qaytarılması aqqında Rusiye Tış işler nazirligi bildirgen edi.
«Ğaydamaka», «Sapfir» ve «Titan» ukrain buksirleri FSB zapt etken arbiy gemilerni Qırımdan alıp, noyabrniñ 20-nde aqşam esas Ukrainağa qaytardı.
Ukraina prezidenti Volodımır Zelenskıy noyabrniñ 21-nde gece Mıkolayıv vilâyetiniñ Oçakiv deñiz limanında Ukraina arbiy katerleri ve buksiriniñ qaytarılmasını tebrikledi.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, berilgen malümatqa köre, üç Ukraina arbiy gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Ukraina deñizcileriniñ 6 yılğa qadar azatlıqtan marum qalması mümkün edi.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
