Ukraina prezidenti Volodımır Zelenskıy, Rusiye ilhaq etken Qırımnı qaytarmaq içün taqımınıñ "bir qaç formatı" bar olğanını ayttı, amma tafsilâtlarnı açıqlamadı.
Bunı o, sentâbr 13-ünde Kyivde 16-ncı "Yalta Avropa strategiyası" forumında ayttı.
"Eñ qıyın vaziyet Qırımnıñ qaytarılmasınen bağlı. Açıqtan aytayım: biz, bir qaç formatımız bar, dep tüşünemiz, bir qaç ğayemiz bar, amma olar aqqında sizge aytıp olamayım. Bu, almaşuvnen kibi, erte olacaq, onıñ içün bir de birisi ğayelerimizni qullanğanını istemeyim. Menim müim körüşüvlerim olacaq. Men, Amerika Qoşma Ştatları prezidentinen körüşüvni bekleyim. Biz model aqqında tüşünecekmiz... Mümkün olsa, bu yerde toqtabayım. Amma biz, Qırımnı qaytarmaq içün küreşecekmiz ve yalıñız sözlernen degil", – dedi Zelenskıy.
Kyivde sentâbr 12-sinde 16-ncı "Yalta Avropa strategiyası" forumı açıldı, anda sentâbr 13-ünde Ukraina prezidenti Volodımır Zelenskıy da keldi.
Bu yıl forumnıñ adı – "Baht şimdi. Burhanda dünyanıñ yañı yanaşmaları" edi. Teşkilciler, konferentsiyada 26 memleketten 400-den ziyade belli siyasetçi, diplomat, iş adamı, cemaat faali ve ekspert iştirak etkenini haber ete.
Tedbir sentâbr 14-üne qadar keçirilecek.
"Yalta Avropa strategiyası" (YAS) – Ukrainanıñ Avropa kelecegi muzakere etilgen forum. 2004 senesinden 2013 senesine qadar YASnıñ er yıllıq körüşüvleri Yaltada Livadiya sarayında keçe edi. Rusiye Qırımnı ilhaq etkeninden soñ, konferentsiya keçirüv yeri – Ukraina paytahtı Kyiv oldı.
