Ukraina prezidenti Volodımır Zelenskıy iyülniñ 13-nde Qırımnıñ memuriy sıñırındaki «Çonğar» keçiş noqtasında Herson vilâyeti devlet memuriyetiniñ yañı yolbaşçısı – Ukraina mudafaa naziriniñ sabıq muavini Yuriy Güsevni, em de prezidentniñ Qırım Muhtar Cumhuriyetindeki daimiy vekili Anton Korineviçni taqdim etti.
Qırım.Aqiqat mühbiriniñ bildirgenine köre, Zelenskıy Herson vilâyeti devlet memuriyetiniñ yolbaşçısını taqdim etip, «Çonğar» ve «Kalançak» keçiş noqtalarındaki infrastruktura donatuvı ve işlerniñ bitecek vaqtı aqqında tarif etmege rica etti.
Keçiş noqtasınıñ servis alanında keçirilgen toplaşuvda vilâyet devlet memuriyetiniñ birinci şahısları ve uquq qoruyıcılar arasında infrastruktura naziriniñ muavini Yuriy Lavrenük, vaqtınca işğal etilgen topraqlar ve memleket içinde köçip kelgen şahıslarnıñ meseleleri naziriniñ birinci muavini Yusuf Kurkçi, Qırım Muhtar Cumhuriyetiniñ prokurorı Günduz Mamedov, muavini İgor Ponoçevnıy, ombudsmenniñ Qırım Muhtar Cumhuriyeti ve Aqyar şeeri sakinleriniñ insan aqlarına riayet etüv vekili İsmail Halikov bar edi.
Hatırlatamız, iyünniñ 25-nde Anton Korineviç Ukraina prezidentiniñ Qırım Muhtar Cumhuriyetindeki daimiy vekili vazifesine tayin etildi. Prezident temsilciliginiñ resmiy saytında buña dair buyruq derc etildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
