Ukraina prezidenti Volodımır Zelenskıy işğal etilgen Qırımda tutulğan bütün Ukraina vatandaşlarınıñ azat etilüvi müim olğanını bildirdi.
«Rusiye Federatsiyasında daa çoq insanımız bar, Qırımdan ketirilgenler de çoq, bunı añlaymız. Şimdi oğraşqan başqa bir meselemiz», – dep bildire Zelenskıynıñ aytqanlarını Prezident ofisiniñ matbuat hızmeti.
Haberde aytılğanına köre, prezident «işğal etilgen Donbas topraqlarında ve Rusiyede qanunsız tutulğan bütün vatandaşlarnıñ» qaytması Ukraina içün müim ola, dep qayd etti.
Ukraina prezidentiniñ Qırım Muhtar Cumhuriyetindeki temsilciligi, qırımlı mabüsler sırada azat etilecek insanlarnıñ cedveline kire, dep bildirdi.
Daa evel Qırımtatar Milliy Meclisiniñ reisi Refat Çubarov yañı yıl arfesinde olğan deñişim cedvelinde mabüs etilgen 65 siyasiy mabüs qırımtatarı yoq, dep qayd etti.
Meclis reisiniñ muavini Ahtem Çiygoznıñ qayd etkenine köre, işğal etilgen Qırımda ve qomşu Rusiyede apiske alınğan qırımtatarlarnı azat etmek içün «Rusiye prezidenti Vladimir Putinge büyük basqı yapılmalı, bugünde-bugün bu yoq».
Ukraina ve Donetsk ve Lugansk vilâyetleriniñ işğal etilgen rayonları arasında tutulğan şahıslar dekabrniñ 29-nda deñiştirildi. Azat etilgen Ukraina vatandaşlarını uçaqnen «Borıspil» ava limanına alıp ketkenler. Umumen deñişim çerçivesinde Ukrainağa 76 insan teslim etildi: 12 arbiy ve 64 vatandaş.
Ukrainadan teslim etilecekler cedvelinde olğanlar arasında 2014 senesi Maydanda insanlarnı atıp öldürgeninde qabaatlanğan beş sabıq Berkut hadimi, 2015 senesi Harkivdeki terror ücüminde qabaatlanğan ve ömür boyu apis cezasına üküm etilgenler bar.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
