Ukraina prezidenti Volodımır Zelenskıy Ukraina Milliy telükesizlik ve mudafaa şurasınıñ iyünniñ 16-nda qabul etilgen sanktsiyalar aqqında qararını işke tüşürdi.
Bunıñ aqqında prezidentniñ iyülniñ 23-yu tarihlı fermanında haber etile.
Ferman quvetini yayınlanğan kününden başlap ala. Sanktsilar üç yılğa qoyula.
Ferman ilâvesinde Ukrainadaki aktivleri buzlatılmaq kerek olğan dört Rusiye ve eki Frenkistan vatandaşı bar.
Bundan ğayrı, Rusiyeniñ Wildberries şirketi ve Ukraina, Poloniya, Ermenistan, Belarusiye, Qırğızistan, Qazahistandaki filiallarına, DNR ve işğal etilgen Qırımdaki teşkilâtlar ile bağlı olğan Frenkistandaki üç teşkilâtqa qarşı sanktsiyalar qoyula.
Avropa Birligi memleketleriniñ Tış işler nazirleri Ukrainağa ait Qırım işğali sebebinden Rusiyege qarşı iqtisadiy sanktsiyalarnı uzatmağa qarar çıqardılar. Buña ait vesiqa iyülniñ 12-nde qabul etildi.
Ukraina TİN birinci muavini Emine Ceppar, «Qırım» sanktsiyalar cedvelinde tahminen 5,5 biñ hususiy ve uquqiy şahıs olğanını ayttı. Bunı o, iyülniñ 13-nde «Qırımnıñ işğalden azat etilmesi siyaseti: sanktsiyalarnıñ emiyeti» halqara tögerek masa vaqtında bildirdi, dep haber ete TİN matbuat hızmeti.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
