Yañı saylanğan Ukraina prezidenti Volodımır Zelenskıy «Qırım ilhaqı ve Donbastaki istilâdan soñ Rusiye ile «ortaq» olğan şey tek sıñır» ola, dep ayttı. Bu aqta o, Rusiye prezidenti Vladimir Putinniñ aytqanlarını izaatlap, Facebookta yazdı.
«Ukraina ve Rusiye arasında «umumiy şeyler» çoq olğanını tüşündim. Bugün, Qırım ilhaqı ve Donbastaki istilâdan soñ, «ortaq» şeyimiz bir qaldı – devlet sıñırı. «Umumiy» 2295 kilometr ve 400 metr. Ve Rusiye Ukraina tarafından er millimetr üzerindeki kontrolni qaytarmalı. O vaqıt «ortaq» şeylerni qıdırmağa devam ete bilemiz», – dep yazdı Zelenskıy.
Onıñ bildirgenine köre, «cermay malları ihracınıñ yasağı, işğal etilgen topraqlarnıñ sakinlerine pasportlarnı berüv noqtalarınıñ açılışı, ukrainalılarnıñ esir tutulması memleketlerimiz arasındaki munasebetlerniñ eyilişüvini bir yotqa bile yaqınlaştırmay».
«Böyle munasebetlerge «qardaş» aytamazsıñ», – dep qayd etti Zelenskıy.
Daa evel Putin ukrainalılarnıñ ve rusiyelilerniñ «bir çoq ortaq şeyi» bar, dep bildirgen edi.
«Umumiy vatandaşlığımız olsa, em ruslan, em ukrainler fayda körer», – dep ayta o.
Rusiye qoltutqan aydutlar tarafından kontrol etilgen Ukraina şarqındaki rayonlarnıñ sakinlerine Rusiye vatandaşlığını qolay almağa imkân bergen buyruqnı Rusiye prezidenti Vladimir Putin aprelniñ 24-nde imzaladı. Vesiqa metni Kremlniñ saytında derc etildi.
Yuqarı Rada bir sıra halqara teşkilât, Avropa Birligi memleketleri, ABD, çetel devletleriniñ Ukrainadaki diplomatik temsilciliklerine muracaat etip, Moskva qararından sebep Rusiyege qarşı sanktsiyalarnı quvetleştirmege çağırdı.
Ukraina prezidenti Petro Poroşenko Rusiye prezidenti Vladimir Putinniñ Donbasnıñ işğal etilgen topraqlarında yaşağanlarğa pasportlarnı berüv buyruğı sebebinden halqqa muracaat etti. Yañı saylanğan Ukraina prezidenti Volodımır Zelenskıynıñ taqımı Ukraina vatandaşlarına Rusiye pasportlarını berüv fermanı «Rusiyeniñ işğalci devlet olaraq mesüliyetini tanığanını köstere», dep bildirdi.
