Ukrayina devlet başı Volodımır Zelenskıy, Belarusta Rusiyeniñ özek silâsınıñ yerleştirilmesi Çin yolbaşçısı Si Tszinpin ile Rusiye prezidenti Vladimir Putin arasında muvafaqiyetsiz körüşüvge işaret etecek, dep bildirdi. Bunıñ aqqında "İnterfaks-Ukraina" haber ete.
"Rusiyeniñ Belarus topraqlarında özek silâsı yerleştirecegine dair signal Çin ile muvafaqiyetsiz körüşüvden bahıs ete", - dedi o.
Zelenskıynıñ sözlerine köre, bu, Putinge onıñ reberligi altındaki Rusiye Federatsiyasınıñ artıq tamamınen ğayıp etkeni bir tür subyektivligini körstermek ve ayrıca bazı siyasiy adımlar ya da ğalebeler köstermek içün kerektir.
Ukrayina prezidenti, Rusiye Federatsiyası tarafından Belarusta özek silâsını yerleştirmesi Aleksandr Lukaşenkonıñ er angi bir subyektivlikni tamamınen ğayıp etmesine delâlet eter.
Martnıñ 25-nde Vladimir Putin Rusiye Belarusta taktik özek silâsını yerleştirecek, dep bildirdi – iyülniñ 1-ne qadar mahsus anbar qurucılığı yekünlenmeli. Bundan ğayrı, Minskke «İskander» raketa kompleksi ve özek raketalarını taşığan uçaqlar berildi.
Çin prezidenti Si Tszinpin martnıñ 22-23 Rusiyeni ziyaret etti ve Rusiye ükümetiniñ temsilcileri ile resmiy körüşüvler keçirdi.
Amerika Cenk araştırma merkezi, Rusiye prezidenti aytışmalardan beklegenini alamağanını bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
