Qazahistannıñ sabıq prezidenti Nursultan Nazarbayev Rusiye ve Ukraina liderleriniñ muzakerelerini teşkil etüv meselesinde öz yardımını teklif etti. Onıñ aytqanına köre, Volodımır Zelenskıy körüşüvge razı oldı, ve bu aqta Vladimir Putinge haber etildi. Moskva ve Kyiv bu malümatnı şimdilik izaatlamaylar. Bu aqta Azatlıq Radiosı bir sıra kütleviy haber vastasınıñ malümatına esaslanıp bildire.
«Zelenskıy körüşüvge razı oldı, men Rusiye prezidentine haber etti. Bitaraf meydançıq kerek olsa, Qazahistannı teklif ettim», – dep bildire Nazarbayevniñ aytqanlarını Reuters agentligi.
Sabıq Qazahistan prezidentiniñ teklifi aqqında RİA «Novosti» de yaza.
Zelenskıy, bu malümatnı resmiy şekilde tasdıqlamadı.
Ukraina Tış işler naziri Vadım Prıstayko, Zelenskıy Putinnen añlaşacaq degil, yalıñız Ukrainada insanlar elâk olmasın dep, belli munasebetler quracaq ola, dep bildirgen edi.
Donbastaki cenkniñ toqtatılması Volodımır Zelenskıynıñ saylavaldı vadelerinden biri edi.
Soñki ayları Kyiv zıddiyetni bitirmek içün muzakereler keçirilecek «Norman formatında» sammit olmasını talap ete, lâkin körüşüv künü daa belgilenmedi.
