Ukraina lideri Volodımır Zelenskıy Rusiye prezidenti Vladimir Putinnen muzakere keçirmege azır olğanını bildirdi, lâkin bu muzakereler muvafaqiyetsiz olsa, bu «üçünci cian cenki» olacaqtır, dep qayd etti.
«Onen muzakerelerge azırım. Soñki eki yıl devamında azır edim. Mence, bu cenk muzakeresiz bitmeycek», – dedi Zelenskıy CNN intervyüsında.
«Mence, muzakere keçire bilmek, Putinnen laf ete bilmek içün er angi formattan, er angi fırsattan faydalanmalımız. Amma bu ıntıluvlar muvafaqiyetsiz olsa, bu üçünci cian cenki demektir», – dep qoştı o.
Prezidentniñ aytqanına köre, Ukraina bu muzakerelerde iç bir vaziyette topraq bütünligini beremez.
«Topraq bütünligimiz ve suverenitetimiznen bağlı iç bir uzlaşuv olmaycaq, ve bu aqta Ukraina halqı ayttı, olar rus askerlerini çeçeklernen qarşılamadı, olar qolunda silânen olarnı cesaretnen qarşıladı», – dedi Zelenskıy.
Onıñ qayd etkenine köre, Ukraina NATOda olsa edi – Rusiye ücüm etmez edi.
«Men memleketim, halqım içün telükesizlik kefaletlerini almağa ister edim. NATO azaları bizni ittifaqta körmege azır olsa, bunı acele yapıñız, çünki er kün insanlar öle… Olardan doğru aytmalarını rica ettim, NATO bizni bir-eki-beş yıldan soñ qabul etmege azır olğanını aytsın, amma açıq ve tam aytsın ya da yoq desin. Ve cevap tam edi: NATO azası olmaycaqsıñız, amma qapular açıq qalır», – dedi prezident.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
