Frenkistan prezidenti Emmanuel Makron aprelniñ 12-nde Parijde ukrainalı siyasetçi, Ukraina prezidenti namzeti Volodımır Zelenskıy ile körüşti. Subetleriniñ mevzusı aqqında resmiy malümat şimdilik yoq, dep haber ete Azatlıq Radiosı.
Daa evel haber etilgeni kibi, Ukraina prezidenti namzetleri Petro Poroşenko ve Volodımır Zelenskıy aprelniñ 12-nde Frenkistan prezidenti Emmanuel Makron ile Parijde ayrı-ayrı körüşecekler.
Şu künü şimdiki prezident Poroşenko Almaniya kantsleri Angela Merkel ile körüşe.
Almaniya, Frenkistan ve Ukraina, Ukraina ordusınıñ Rusiyeden yardım alğan birleşmelerge qarşı turğan Donbastaki silâlı zıddiyetniñ al etilmesi içün «norman formatında» muzakerelerniñ bir qısmı ola. Rusiye bu formatnıñ dörtünci iştirakçisi ola. Soñki sefer «norman dörtniñ» liderleri 2016 senesi oktâbr ayında körüşken edi.
Ukraina prezidenti saylavlarınıñ birinci tur neticelerine köre, saylayıcılarnıñ 30,24%-ı Volodımır Zelenskıyge rey berdi, 15,95%-ı şimdiki Devlet yolbaşçısı Petro Poroşenkoğa. Ekinci tur aprelniñ 21-nde olacaqtır.
