Ukrayina prezidenti Volodmır Zelenskıy ABD Temsilciler Palatasınıñ spikeri Nensi Pelosi ile Ukrayinağa mudafaa techizatı, makromaliyeviy yardım ve Rusiyege qarşı sanktsiyalarnıñ muzakere etilgen aytışmalarnı "maiyetli ve çoq saalı" adlandırdı.
"Kongressniñ delegatsiyası ile Kıyivge sefer etken ABD Kongressiniñ Temsilciler palatasınıñ spikeri Nensi Pelosi ile devletimizge yardımnıñ esas meselelerini muzakere ettim. Bu ağır bir zamanda paytahtımızğa kelip, Rusiyege böyle müim ve küçlü destek signallar yollağan bütün ortaqlarımızğa minnetdarmız. Pelosi ile 4 saat devamında çoq esaslı, çoq saalı muzakereler keçirdik. Mudafaa teslimat, makromaliyeviy yardım, sanktsiyalar siyaseti ve ABD ile siyasiy işbirlik aqqında laf ettik", - dedi Zelenskıy.
Onıñ sözlerine köre, Ukrayinanıñ mudafaa qabiliyetiniñ quvetleştirilmesi ve Rusiyeğa qarşı sanktsiyalarnıñ qoyulması ile bağlı lend-liz işiniñ konkret saaları da muzakere etildi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
