Ukrayina prezidenti Volodımır Zelenskıy bir daa Ğarpnı Ukraina üzerindeki semanı Rusiyeniñ arbiy aviatsiyası içün qapatmağa çağırdı ve Rusiye raketaları tezden NATO memleketleriniñ topraqlarına tüşecek, dep tenbiledi.
Zelenskıy bunı martnıñ 13-nde aqşam Lviv vilâyetinde Halqara Barıştırıcı ve telükesizlik merkezine Rusiyeniñ avadan darbesini izaatlap yapqan muracaatı vaqtında ayttı.
"Anda Rusiye Federatsiyasınıñ topraq bütünligine tehdit ete bilecek iç bir şey yoq edi. Ve anda episi olıp 20 kilometr uzaqlıqta NATO sıñırıdır. Keçken sene men NATO liderlerini açıq şekilde tenbilegen edim: Rusiyege qarşı qattı sanktsiyalar olmasa, o cenk başlaycaq. Aqlı edik... Şimdi de kene tekrarlayım: eger siz bizim semamıznı qapatmasañız, Rusiye bombalarınıñ siziñ topraqlarıñızğa tüşmesi zaman meselesidir", - dedi prezident.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
