Ukrayina devlet başı Volodımır Zelenskıy Ukrayina musulmanlarını Ramazan ayınıñ başlaması ile hayırladı. Buña ait muracaatnı matbuat hızmeti yayınladı.
"Bu aqşam musulmanlar içün muqaddes Ramazan ayı başlana. Ukrayina musulmanlarınıñ büyük qısmı olğan qırımtatar halqı Ramazan ayını işğalde, Qırımda Rusiye tarafından yapılğan basqılar altında, horlav telükesi şaraitinde, Ukrayinanıñ başqa taraflarındaki ateşler astında ve küreş meydanındaki uruşlarda qarşılmağa mecburlar. Biz bütün devletimizge ve er bir cemiyetke azatlıqnı, telükesizlikni keri qaytarırmız. Ve bu muqaddes ayda oqulğan dualarımız Rusiyeniñ deşetli cinayetlerini, kerçekten iç bir şeyge inanmağanlarnı ve bu sebepten böyle terror yapqanlarnı Ukrayinadan def etmege yardım etsin. Kelecek Ramazan ayı tınçlıqta ve Rusiyeden bütünley azat etilgen ukrayin toprağında başlansın", - dedi devlet başı.
Ramazan — icriy taqvimniñ doquzıncı ayı, İslâm dininde muqaddes ay. Bu ay vaqıtta er bir imanlı musulmanğa orazanı tutmaq kerek, İslâmnıñ beş şartından biri. 30 kün devam ete ve musulman icret taqvimine bağlı ola. Oraza tañ atar vaqtında başlana ve qavuşmattan soñ bite, arasında aşamağa ve içmege mümkün degil. Ramazanda yaramay fikirler, tütün içüv ve mahrem yaqınlığı da yasaq ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
