Ukrayina prezidenti Volodımır Zelenskıy, Ukrayinanıñ telükesiziligine kefaletler üzre halqara mesleat gruppasınıñ terkibine kirsetilecek mütehassıslarnıñ esas vazifesi ukrayinlerniñ bir çoq nesilleri içün işleycek teminatlarnıñ azırlanması olacağını bildirdi.
"Bu cenkten soñ Ukrayinanıñ işançlı telükesizlik kefaletlerini alması içün işimizni devam etemiz. Hususan, Ukrayina prezidenti ofisiniñ reisi Andriy Yermak ve NATO-nıñ sabıq Baş kâtibi Anders Fog Rasmussen yolbaşçılığında halqara mesleat gruppası teşkil etilgen. Gruppanıñ terkibine telükesizilik ve mudafaa, diplomatiya saalarındaki yetekçi mütehassıslar da kirecek. Olarnıñ vazifesi kerçekten çalışacaq kefaletler formatını azırlamaqtır. Ve bu bir ay ya da bir yıl degil, ukrayinlerniñ bir çoq nesilleri içün işleycek", - dedi Zelenskıy.
Mayısnıñ 24-nde Ukrayina prezidenti ofisiniñ reisi Andriy Yermak Davosta Dünya ikhtisadiyat forumınıñ çerçivesinde Securing Europe panelinde iştirak etip, Ukrayinanıñ telükesiziligine kefaletler üzre halqara mesleat gruppasınıñ teşkil etilmesini ilân etti.
Onıñ sözlerine köre, gruppanıñ maqsadı "Ukrayina içün işançlı ve semereli telükesizilik kefaletleri ile bağlı bazı tevsiyelerni bermektir".
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
