Avgustnıñ 18-nde Lvivde Ukrayina prezidenti Volodımır Zelenskıy BMT baş kâtibi Antonio Guterres ile körüşti.
"Biz zahire teşebbüsiniñ ömürge keçirilmesinde koordinatsiyanı devam ettirmege añlaştıq. Onıñ inkişafınıñ ola bilecek yönelişlerini, ukrayinlerniñ qanunsız ve mecburiy sürgün etilmesi, arbiylerimizniñ ve ekimlerimizniñ esirlikten azat etilmesi meselelerini muzakere ettik", - dep bildirdi Zelenskıy.
Haber etilgeni kibi, taraflar "Rusiyeniñ Zaporijjâ AES-da özek şantajinı" da muzakere etkenler.
"Tecavuzcınıñ bu añlı terrorınıñ dünya mıqyasında felâketli aqibetleri ola bile. Bu sebepten BMT bu strategik obyektniñ telükesiziligini, onıñ arbiysizleştirilüvini ve Rusiye orusından tam şekilde azat etilmesini temin etmelidir", - dedi devlet başı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
