Rusiye Federatsiyasınıñ quvetleri adiy insanlarğa qarşı cenkleşmege devam ete, dep qayd etti Ukrayına prezidenti Volodımır Zelenskıy, martnıñ 2-ne keçer gecesi Rusiyeniñ kamikadze dronlarınen kerçekleştirilgen ücümini izaatlap.
«Rusiye adiy insanlarnen cenkleşmege devam ete. Gece «şahedlerniñ» ücümi: Harkiv, Odesa, Sumı vilâyetiniñ şeerleri. Duşman dronlarından biri Odesada mesken evge çarptı. 18 daire yoq etildi», – dep yazdı Ukrayına prezidenti.
Qıdıruv-qurtaruv tedbirleri toqtamayıp devam ete. Yaralanğanlarğa kerekli yardım kösterile, dep qayd etti prezident.
«Ortaqlarımızdan daa çoq ava mudafaa sisteması kerek. İnsanlarımıznı Rusiye terrorından qorumaq içün Ukrayınanıñ ava qalqanını quvetleştirmek kerek. Daa çoq ava mudafaa sisteması, daa çoq ava mudafaa sisteması içün raketalar – bular ayat qurtara», – dep qoştı Zelenskıy.
Daa evel berilgen malümatqa köre, Odesada gece dron ücümi neticesinde doquz qatlı binanıñ 18 dairesi yoq etildi. Odesa vilâyetiniñ arbiy memuriyet yolbaşçısı Oleg Kiper elâk olğan üç kişi aqqında bildirdi. Ukrayına baş prokurorı Andriy Kostin Azatlıq Radiosınıñ mühbirine izaat berip, Odesada elâk olğanlar arasında bala bar, dep bildirdi.
Rusiye arbiyleri çeşit silâlardan – dron, raketalar, RSZO - Ukrayına regionlarına muntazam surette ücüm ete. Yanvar ayında Rusiye ücümlerini quvetleştirdi, neticede onlarnen insan elâk oldı, yüzlernen insan yaralandı.
Moskva, isbat ve şaatlıqlarğa baqmadan, tam cenk başlağanından berli Ukrayınada vatandaşlarğa ateş açılğanını red ete.
Fevralniñ 24-nde Ava quvetleri komandanı Mıkola Oleşçuk büyük cenkniñ eki yılı devamında Ukrayına arbiyleri 1905 Rusiye raketasını, hususan 25 «Kinjal», 4844 darbe dronı ve 7660 operativ-taktiv seviyeli uçucısıznı yoq etti, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
