Link açıqlığı

Saatnıñ esas haberi

Zelenskıy, «er kesni er keske» deñişiminiñ üç basamağı aqqında tarif etti


Volodımır Zelenskıy
Volodımır Zelenskıy

Ukraina prezidenti Volodımır Zelenskıy «er kesni er keske» şeklinde esirler deñişiminiñ tafsilâtlarını aydınlattı. Onıñ aytqanına köre, bu esnas bir qaç basamaqtan ibaret.

«Doğrusını aytqanda, «er kesni er keske» deñişimi – mücerret bir mesele. Şunıñ içün «er kesni er keske» deñişiminiñ bu blokunı başlatmağa añlaştıq. Aqqında kelişken insanlarımıznı deñişecekmiz. Şimdi bizge cedvellerni kösterecekmiz. Başta işğal etilgen Donbastaki esirler, soñra Rusiyede olğanlar ve daa soñra Qırımda olğanlar aqqında laf kete. Bularnı birleştirmege ister edim, amma bu qıyın. Amma birinci adım atayıq, çünki 72 insan evine qayta bile. Bunı yılnıñ soñuna qadar yapmağa ister edim», – dep añlattı Zelenskıy Parijde jurnalistlerge.

Ukraina prezidenti Volodımır Zelenskıynıñ bildirgenine köre, «Normandiya formatındaki» muzakerelerde Ukraina ve Rusiyede tutulğan şahıslarnı «er kesni er keske» şeklinde deñişim aqqında añlaştılar. Matbuat konferentsiyasında Zelenskıy, «Donbas ve Rusiye ilhaq etken Qırım – Ukrainadır», dep qayd etti.

Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.

Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.

Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.

XS
SM
MD
LG