Ukrainada COVID-19-ğa qarşı küreşniñ esas devri aprelniñ 20-lerinde olacağı beklenile, haber etti Ukraina prezidenti Volodımır Zelenskıy, bildire Azatlıq Radiosı.
"Ukrainada hastalarnıñ statistikasını talil etkende, soñki künlerde belli bir stabillesme olğanıı qayd etmek mümkün. Keskin bir artuv, özüni daimiy izolâtsiyada tutqan vatandaşlarınıñ şuurları sayesinde olmadı. Ve bunı devam etmek kerek. Aydın şekilde añlamalımız: raat olmaq ertedir, raat olmaq havflıdır. Eger İtaliya ve İspaniyada epidemiyanıñ zirvesi keçken olsa, bizde ise esas devir daa ögümizdedir. Bu, aprelniñ 20-leridir. Onıñ içün Pasha bayramında er ukrainniñ evde olması ğayet müimdir", - dedi Zelenskıy öz video hitabında.
Aprelniñ 14-nde saba Ukrainada (ilhaq etilgen topraqlarsız) 3372 koronavirus hastalığı adisesi qayd etildi. 98 adam öldi, 119 - tedaviylendi.
Aprelniñ 14-nde saba koronavirus hastalığı sebebinden 606 insan ekimlerniñ közetüvi altında buluna.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
