Ukrayina prezidenti Volodımır Zelenskıy BMT Telükesizlik Şurasınıñ toplaşuvında Rusiye ukrayin AES-larına ücüm etmek istegenini ve Kıyivniñ delilleri bar olğanını bildirdi.
"Şimdi biz bu cenkte üçünci qışqa yaqınlaşamız, ve Rusiye kene de bizim energetik sistemamıznı bozmağa tırışa. Bu sefer olar daa da tsinikler, bizim özek elektrik stantsiyalarımızğa ücüm etmege azırlanalar. Bizde bu malümat ve deliller bar", — dep bildirdi o.
Rusiye bu qadar uzaqqa barmağa azır olsa, demek ki, Moskva içün iç bir şey qıymetli degil, dep qoştı Zelenskıy.
Şimdiki vaqıtta Rusiye temsilcisi BMT Telükesizlik şurasınıñ toplaşuvında Zelenskıynıñ bu qabaatlavlarını izaatlamadı.
Evel Ukrayina tış işler naziri Andriy Sibiğa, ukrayin istihbaratınıñ malümatına atıf etip, Rusiye qış arfesinde Ukrayinanıñ özek energetikasınıñ kritik obyektlerine ücüm etmege azırlana, dep bildirdirgen edi. Hususan, onıñ aytqanına köre, söz, atom energetikasınıñ telükesiz çalışması içün kritik olğan, atom stantsiyalarınıñ açıq dağıtıcı cihazları ve berüv stantsiyaları aqqında kete.
2022 senesi oktâbr ayından başlap Rusiye quvetleri muntazam sürette Ukrayinanıñ kritik infrastruktura obyektlerine ücüm ete. Bu ücümler neticesinde yarıq söndürüv cedveli kirsetile, Ukrayina ise, elektrik qıtlığını ödemek içün, energiyanı ithal etmek mecbur.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
