Ukrayina prezidenti Volodımır Zelenskıy, Rusiyeniñ raketa darbelerini endirgen soñra toplanğan BMT Telükesizlik Şurasınıñ oturışında çıqışta bulunır eken, Ukrayinanıñ Rusiyeniñ energetik terrorını takbih etken bir qararnı qabut etmekni teklif etti.
"Dünyanıñ bugünki Rusiye terrorına sert cevap bermesini bekleymiz. Ortaqlarımıznıñ qarşılığını bekleymiz. Biz çetten baqqanlarnıñ qrşı amellerini degil, dostlarımıznıñ qarşılığını bekleymiz. BMT Telükesizlik Şurasınıñ nizamnamesini kerçekten tanığanlarnıñ qarşılığını bekleymiz... Energetik terror - kütleviy telef silâsınıñ qullanmasına beñzey. Tışarıda ava arareti sıfırdan aşağı olğanda, Rusiye raketalarınıñ energetik obyektlerine urması neticesinde on millionlarnen insan elektrik, issilik ve suvdan marum qalğanda, bu insanlıqqa qarşı açıq cinayettir", - dedi Zelenskıy.
Zelenskıy, Rusiye "çoqtan berli BMT Telükesizlik Şurasını ritorika meydanına çevirmege tırışa", dep bildirdi.
"Telükesizlik Şurası BMT Nizamnamesiniñ 7-nci bölügine uyğun olaraq terrorcı devletniñ areketlerini doğru qıymetlendirmeli. Ukrayina Telükesizlik Şurasınıñ er türlü energetik terrorını ayıplağan bir qarar leyhasını qabul etmesini teklif ete. Baqayıq, Rusiye ile birlikte dünyada birileri silâsız adamlarğa qarşı terrornıñ yahşı bir şey olğanını aytıp olacaqmı?", - dep qayd etti devlet başı.
O, Rusiyeniñ kendisi öz tecavuzı ve terrorı ile bağlı iç bir rey berüvde iştirak etmemelidir, dep talap etti.
"Cennke sebep olğan, terrornıñ aqibetlerinden mesüliyetli olğan memleket BMT Telükesizlik Şurasınıñ öz mandatını yerine ketirme ıntıluvını blok etmesi şaşırtıcı bir şeydir. Cinayet cenkiniñ sebepçisiniñ veto aqqında marum etilmemesi kerçek bir saçmalıqtır. Dünyanı bu çıqılmaz vaziyetten çıqarmalımız. Bu tamamınen mümkündir. Dünya bir halqara terroristiniñ reinesi olmamalıdır. Rusiye elektrik generatorını BMT Nizamnamesinden daa da küçlü ve kerekli bir vasta alına ketirmek içün er şey yapa. Er şeyge ve er şeyden evel BMT Nizamnamesine kerçek mana bere bilemiz ve bunı yapmalımız. Siziñ qararlarıñızğa ihtiyacımız bar", - dep muracaat etti o.
Noyabrniñ 23-nde Rusiye Kyiv ve diger Ukrayına şeerlerine qarşı kene raketalarnen ücüm etti.
Moskva bir sıra delil olğanına baqmadan, vatandaşlarğa qarşı ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
