Ukraina prezidenti Volodımır Zelenskıy Avropa şurasınıñ yañı prezidenti Charles Michelnen Rusiyege qarşı sanktsiyalarnıñ uzatıluvını muzakere etti, dep bildirdi Ukraina prezidentiniñ ofisi.
«Avropa Birligi aza devletleriniñ liderleri Ukraina topraq bütünligi ve suverenitetine qoltutuvda birlik olıp, Minsk añlaşmaları yerine ketirilgenine ve Ukraina topraq bütünligi ğayrıdan tiklengenine qadar Rusiyege qarşı sanktsion basqını devam ettirecek, dep ümüt etem», – dedi Zelenskıy.
O, Ukraina gaz tranziti meselesinde işançlı ortaq olıp qalacağını tasdıqlap, Avropa Birligine üç taraflı muzakerelerde köstergen destegi içün teşekkür bildirdi.
Charles Michel, Ukrainanıñ Avropa integratsion islâatlarını kirsetüvde ilerilegenini tebriklep, Avropa Birligi bu esnasta ileride de yardım etmege azır, dep tasdıqladı.
2014 senesi Qırım işğal etilgen soñ ve Donbasta cenk areketleri başlağan soñ Avropa Birligi Ukrainanıñ topraq bütünligi, suvereniteti ve mustaqilliginiñ bozuluvınen bağlı sanktsiyalarnı kirsetip, er seferinde uzata. Brüsselde Kremlniñ Ukrainağa qarşı istilâsı sebebinden sanktsiyalarnıñ lâğu etilmesini teklif etken siyasiy küç ve liderler kene de bar.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
