Ukraina prezidenti Volodımır Zelenskıy The Washington Post intervyüsında Ukraina akimiyeti Qırımnıñ Rusiye tarafınıñ işğal etilüvini «unutmaycaq», dep qayd etti. Bu aqta Ukraina prezidentiniñ ofisi bildire.
«Ukraina ve dünya Qırımnı unutsınlar isteyler. Olar onı işğal etti ve Donbastaki separatistlerge qoltuttı. Biz Qırımnı unutsaq, olar Donbasnı bermege razı olurlar. Amma Qırımnı kimse unutmaycaq», – dep qayd etti o.
Zelenskıy, Rusiye ile dialog qurmağa istey, dep haber etti.
«Amerika Birleşken Devletlerinden bizge format tapmağa yardım etmesini rica etem. Biz dialogğa qoltutamız, biz cenkke qarşımız», – dep ayttı Ukraina prezidenti.
Ukraina devlet yolbaşçısı bir çoq rusiyeli dostu ve tanışı Rusiye ve Ukraina arasında «olğanlarğa yazıqsına», dep tarif etti.
«Topraqlarımız bizge qaytacaq. 2014 senesi dost edik, şimdi bir-birimiznen cenkleşemiz. Putinniñ barışıq qararğa razı olıp, masa başına oturmaq ve uzlaşmaq fırsatı bar», – dep tüşüne Zelenskıy.
Yanvarniñ 19-nda Zelenskıy ukrainalılarnı Rusiyeniñ tecavuzı sebebinden «telâşlanmamağa» çağırdı.
Bıltır küzde kütleviy haber vastalarında istihbaratnıñ Ukraina sıñırında Rusiye ordusı toplaşqanına dair malümatı peyda olıp başladı. ABD ve diger Ğarp memleketleri Moskva arbiy istilâğa azırlana, dep tahmin ettiler. Kreml bunı inkâr ete.
