Prezident Volodımır Zelenskıy muzakere delegasiyanıñ esabatını diñledi — bu aqta o, Abu-Dabideki muzakerelerniñ birinci kününden soñ, Boşnıñ 10-da öz içtimaiy ağlarındaki saifelerinde bildirdi.
O, başta Avropa ve Amerika ortaqlarınen subet, soñra ise Ukrayina-Amerika-Rusiye delegasiyaları arasında üç taraflı format olıp keçkenini bildirdi.
Zelenskıy üç taraflı formatnı "konstruktiv ve ğayet manalı" dep adlandırdı. Toplaşuv devamında gumanitar adımlarnıñ kerekligi ve ola bilcek parametrler muzakere etildi.
"Esirlerniñ azat etilmesi — bu birinci nevbetteki vazifedir. Biz Ukrayina içün telükesizlik kefaletleriniñ mündericesini ve olarnı uzun müddetli ömürge keçirmekniñ esaslarını tafsilâtlı muzakere ettik. Bizge cenkniñ er angi bir tekrarlanmasınıñ ögüne almaq içün kerçek aletler kerek. Deeskalasiya tedbirleriniñ kerekligi de muzakere etildi", — dedi o.
Prezident, Ukrayin taqımı ögünne ilerideki dialog içün açıq maqsatlar qoyğanını qayd etti. Bular em yarın üç taraflı formatta, em de umumen yaqın künlerde Amerika prezidentiniñ vekilleri ve Avropa delegatlarınen olacaq subetler.
"Esas vazife — kerçekten de barışıqnı yaqınlaştırmaq, ve Ukrayin tarafından tek mahsuldar, keyfiyetli ve namuslı iş olacaq", – dep qoştı o ve muzakerelerni teşkil etken Amerika tarafına ve muzakerelerni keçirmek içün meydan bergen Birleşken Arap Emirliklerine teşekkür bildirdi.
Evel Ukrayina muzakere gruppasına yaqın menba Azatlıq Radiosına bergen intervyüsında Abu-Dabide üç taraflı muzakerelerniñ birinci kününde yaqın vaqıtta mabüslerniñ büyük deñişmesi aqqında añlaşma elde etilgenini ayttı.