Ukrayına prezidenti Volodımır Zelenskıy cumaaqşamı künü Washingtonda Amerika siyasetçilerinen körüşip, Ukrayınağa yañı silâ qazandırmağa ve Amerika Birleşken Devletlerniñ Kyivge yardım etmesini devam ettirmege tırışa.
Zelenskıy ABD Kongressini ziyaret etip, prezident Bidenniñ siyasetine qoltutqanlarnen, em de cumhuriyetçilernen körüşti.
Ukrayına prezidenti cumhuriyetçiler kontrol etken Vekiller palatasınıñ reberinen körüşti, Senatnıñ qapalı toplaşuvında çıqışta bulundı.
Joe Biden memuriyeti Kongressten Ukrayına ihtiyaclarına daa 24 milliard dollar berilmesini istey. Vekiller palatasında ve Senatta bazı cumhuriyetçiler bunı şübhege oğrata. Palat spikeri Kevin McCarthy Zelenskıyge istekleri yerine ketirelecek, dep vade etip olamağanını ayttı. «Endi berilgen paranen bağlı esabat barmı? Zafer planı barmı? Amerikalılar bunı bilmege istey, dep tüşünem», – dedi o. McCarthy Ukrayına prezidentinen körüşken soñ muzakerelerni «yahşı» ve «semereli» dep adlandırdı.
Senattaki Demoraktik çoqluqnıñ lideri Chuck Schumer qayd etkenine köre, Zelenskıy Ukrayına yardım alamasa, cenkte yutquza bile, dep ayttı. Vekiller palatası cumhuriyetçilerniñ tış siyaseti komitetiniñ yolbaşçısı Michael McCaul Ukrayına prezidenti körüşüvde aksine ğalebe qazanacaqlarından emin olğanını bildirdi, amma bu ğalebege ketken yolnıñ bir qısmı ABD tarafından yañı yardımnıñ berilüvinen bağlıdır.
McCaul aytqanına köre, Ukrayına lideri birinciden F-16 qırıcıları ve ATACMS uzaq mesafeli raketaları aqqında soradı.
Zelenskıy Kapitoliyni ziyaret etip, Pentagonğa yol aldı. Anda ABD mudafaa naziri Lloyd Austinnen muzakereler keçirdi.
Zelenskıynen ABD prezidenti Joe Bidennen körüşüvi beklenide. Biden Ukrayınağa 325 million dollarlıq arbiy yardım berilüvi aqqında ilân etmege planlaştıra, dep yaza «Amerikanıñ sesi». ATACMS raketalarınıñ berilüvi aqqında, büyük ihtimalnen, aytılmaycaq, çünki ABD memuriyeti daa qarar almadı.
ABD Kongressinde demokratlar ve cumhuriyetçiler arasında 2024 senesiniñ bücet qanun leyhalarınen bağlı davalar devam ete. Oktâbrniñ 1-ne qadar qabul etilse, federal ükümet şimdiki masraflarnı qarşılap olamaz – şatdaun olacaq. Ukrayınağa berilecek yardım miqdarı eñ çoq laf etilgen meselelerden biri ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
