ABD, hususan prezident Joe Biden, Ukrayinanıñ Rusiye ile cenkte ğalebe qazanma planına qoltutmasa, bu uzun ve yorğun cenkke ketire bile, dep bildirdi Ukrayina prezidenti Volodımır Zelenskıy The New Yorker amerika neşri içün bergen intervyüsında.
"Bu qorqunçlı bir fikir. Bu, Bayden cenkni Rusiyeniñ ğalebesinden marum etüv yolunen bitirmege istemey, demek olur. Ve biz imkânsız, pek çoq insannıñ ölümine ketirecek pek uzun bir cenkni elde etecekmiz", — dep ayttı Ukrayina prezidenti.
Zelenskıy şunı da ayttı ki, Ukrayina "B" planını azırlamadı, yani ğalebe planınıñ bir de bir alternativası yoq.
"B" planında yıllarca yaşaymız. "A" planı cenk başlanmazdan evel teklif etilgen edi, o vaqıt biz eki şeyge çağırğan edik: preventiv sanktsiyalar ve Ukrayinanı silâ ile preventiv quvetleştirüv. Men ortaqlarımızğa aytqan edim: Ukrayina pek küçlü olsa, bir şey olmaz. Olar diñlemediler. O vaqıttan berli olar episi men aqlı olğanımnı tanıdılar. Ukrayinanıñ quvetleşüvi Putinnıñ istilâsınıñ ihtimalını bayağı eksiltecek edi", — dep qayd etti Ukrayina lideri.
Zelenskıynıñ aytqanına köre, ğalebe planı Ukrayinanı quvetleştirüv planıdır: "Bu fantaziya ya da ilmiy fantastika degil, ve eñ esası, muvafaqiyetke irişmek içün rusiyelilernen işbirlik talap etmey. Daa ziyade, planda ortaqlarımıznıñ Rusiye iştiragi olmadan yapa bilecekleri yazılğan. Diplomatiya eki tarafnıñ istegi olsa, o zaman diplomatiya semereli olması içün planımıznıñ amelge keçirilmesi yalıñız bizge ve ortaqlarımızğa bağlıdır.
Evel Zelenskıy, Ukrayinanıñ "ğalebe planı" endi tolusınen azır olğanını ve şimdi eñ esası "onı yerine ketirme qararlılığı" olğanını bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
