Ukraina prezidenti Volodımır Zelenskıy, 2020 senesi 18 yaşından 27 yaşına qadar erkeklerniñ askerlikke celp etilmesini belgilegen buyruqnı imzaladı, dep bildire Azatlıq Radiosı.
«Arbiy bölükke yollanılacaq kününe qadar 18 yaşını toldurğan ve askerlikten boşatılmağan ya da acele arbiy hızmetine çağıruvı uzatılmağan 27 yaşına qadar sağlıq vaziyeti uyğun olğan Ukraina vatandaşı erkeklerni acele askerlikke celp etmek», – dep aytıla buyruqta.
Erkekler aprel-iyün ve oktâbr-dekabr aylarında askerlikke celp etilecek.
Belgilengen müddet askerligini bitirgen arbiyler yedekke işten boşatıla.
Ukrainanıñ beşinci prezidenti Petro Poroşenkonıñ buyruğına köre, bundan evel askerlikke 20 yaşından 27 yaşına qadar erkekler alına edi.
Ukraina mudafaa naziri Andriy Zağorodnük, askerlikke celp etüvni lâğu etip, ihtisasiy Ukraina ordusına keçmek istegi aqqında bildirgen edi.
