66 yaşında qırımlı siyasiy mabüs Zekirya Muratovnıñ cinaiy davası temyiz mahkemesinde baqılacaq. Onıñ menfaatlarını advokat Edem Semedlâyev temsil etecek, dep haber ete «Qırım birdemligi».
Temyiz arizası Moskvadaki Yuqarı mahkeme baqacaq. Oturışuv 2023 senesi iyülniñ 11-ne belgilendi. Edem Semedlâyev qayd etkenine köre, ileride halqara qurulışlarğa muracaat ete bilmek içün temyizden keçmeli.
«Ebet, Zekirya ağanı aqlanacaq, dep ümüt etemiz. Birinciden, özüni qabaatlı dep saymay. Ekinciden, qırımtatar cemaatı, dost, yaqınları ve soy-sopları böyle tüşüne», – dep qayd etti Semedlâyev.
Yaqında apishanede Muratovnı başqa advokat ziyaret etti. O, qart qırımtatarınıñ alı «bir qarar», amma yaşına köre apishanede bulunması sağlığını zayıflata.
Fevralniñ 11-nde Rusiyeniñ Rostov-na-Donu Cenübiy okrugınıñ arbiy mahkemesi «qırımlı musulmanlar davasınıñ» mabüsi Zekirya Muratovnıñ ükmüni çıqardı. Muratov 11 yıl ve 6 ay sert rejimli koloniyada qalmasına üküm etildi.
Ukrayına Tış işler nazirligi bu ükümni «siyasiy sebepli» dep adlandırdı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
