11 yılğa azatlıqtan marum etilgen qırımtatarı Zekirya Muratov Rusiye Saratov vilâyetiniñ Balaşov apishanesinden Nijniy Novgorodnıñ №5 koloniyasına avuştırıldı. Bu aqta «Qırım birdemligi» haber ete.
«Şimdi eki afta karantinde buluna. Yol bir qarar keçti, kelgen soñ ekim baqıp, bir-eki ilâc bergen. Tam olaraq ne bergenini bilmeyim. Qan basımı, yürek ağrısı ilâclarını er vaqıt ala», – dep tarif etti faallerge qırımtatarınıñ qızı Lenara Mutalupova.
2022 senesi fevralniñ 11-nde Rusiyeniñ Rostov-na-Donudaki Cenübiy okrugınıñ arbiy mahkemesi «qırımlı musulmanlar davasınıñ» mabüsi Zekirya Muratovğa üküm çıqardı. Erkek 11 yıl ve 6 ayğa sert rejimli koloniyada qalmasına üküm etildi.
Ukrayına Tış işler nazirligi bu ükümni «siyasiy sebepli» dep adlandırdı.
2020 senesi iyülniñ 7-nde Rusiye uquq qoruyıcıları yedi qırımtatarını tuttı: Emil Ziyadinov, İsmet İbragimov, Zekirya Muratov, Vadim Bektemirov, Alim Sufyanov, Seyran Hayretdinov mahkemede apiske alındı ve Aqmescit tahqiqat izolâtorına avuştırıldı. 1-inci derece saqatı olğan Aleksandr Sizikov ev apsine alındı. Tutulğanlar Rusiyede yasaqlanğan «Hizb ut-Tahrir» diniy teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
