Rusiye SİZOsında eki taraflı pnevmoniya ve koronavirus olğan Qırımdaki «Hizb ut-Tahrir davasınıñ» mabüsi Zekirya Muratovnıñ apiste tutuv müddeti 2021 senesi noyabr ayına qadar uzatıldı. Oturışuv Rostov vilâyetindeki Cenübiy okrugınıñ arbiy mahkemesinde keçirildi.
Bu aqta Muratovnıñ advokatı Emine Avamileva Qırım.Aqiqatqa bildirdi.
«Zekirya Muratov sağlıq vaziyeti sebebinden mahkeme oturışuvına ketirilmedi. Ekimler Muratovnıñ eki taraflı pnevmoniyası ve koronavirusı bar, dep ayttı, saturatsiyası 80-den 90%-ğa qadar köterile. İmayeniñ muracaatlarına baqmadan, mahkeme sıñırlav tedbirini 2021 senesi noyabrniñ 17-ne qadar uzattı», – dep bildirdi Avamileva.
Avgustnıñ 4-nde haber etilgenine köre, mabüslerni ve SİZOda tutulğanlarnı tedaviylegen Rostov vilâyetlerara №19 verem hastahanesiniñ ekimleri 64 yaşında Zekirya Muratovnıñ alını «orta ağır olaraq» saydı.
2020 senesi dekabr ayında Zekirya Muratovnıñ Qırımdan Rusiyege etap etilgeni belli oldı.
Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
