Temyiz mahkemesi 66 yaşında üçünci derece saqatı Zekirya Muratovnıñ ükmüni deñiştirmedi, dep bildirdi qırımtatarınıñ imayecileri Lilâ Gemeci ve Edem Semedlâyev «Qırım birdemligine» bildirdi.
Çarşenbe künü Moskvadaki Yuqarı mahkemes esli-başlı Zekirya Muratovnıñ ükmüni deñiştirmegen Vlasihadaki İstinaf arbiy mahkemesiniñ qararına qarşı imayeniñ temyiz şikâyetini baqtı. Cenübiy okrugınıñ arbiy mahkemesi onı 11 yılğa üküm etken edi.
Berilgen malümatqa köre, imaye tarafı Zekirya Muratovnıñ qabaatsız olğanını isbatlağan deliller berdi, amma mahkeme olarğa emiyet bermedi.
Advokatlar qayd etkenine köre, «Hizb ut-Tahrir» davalarında qabaatlavnıñ temeli 2003 senesi Hizb ut-Tahrirniñ terror teşkilâtı olaraq tanılmasına dair mahkeme qararı oldı. Lâkin bu qararnıñ qanuniy küçü yoq, çünki 2008 senesinden başlap terrorizm ile küreş qanunı bar.
«Bu qanun esasında islâm azatlıq firqası terror teşkilâtı olaraq tanılmadı ve 2003 senesiniñ qararı qanunsız ola ve lâğu etilmeli», — dep tarif etti Lilâ Gemeci.
Lâkin imayecilerniñ bergen delillerine baqmadan, temyiz mahkemesi Muratovnı apishanede qaldırdı.
«Sağlıq vaziyeti yaşı ve şaraitlerge köre daa yahşı olamay. Qan basımı yüksek ve yürek yetmezligi bar», — dep qoştı imayeciler.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
