Krasnoperekopsk rayonınıñ Yalan Tuş (Bratskoye) köyünde bir qaç saat evelsi tutulğan Asan Zekeryayevniñ ömür arqadaşı çağına yetmegen balalarınen beraber tutuldı. «Qırım birdemligi» bildirgenine köre, Emine ana-babasınıñ evinde edi.
«Maskada ediler. Tintüv keçirmediler. Qardaşımnıñ cep telefonını alğanlar. Ne isteyler, sebep ne – babama aytmadılar. Kimler, angi organlardan, rutbeleri ne – aytılmadı. Asan olarnen beraber edi. Qız qardaşımnı – Asannıñ apayını, balalarını alğanlar ve babama Eski Qırımğa keteler, dep aytqanlar», – dep tarif etti Emineniñ ağası İbraim Çiki.
Uquqçı Lilâ Gemeci bildirgenine köre, bundan evel 25 yaşında Emine Zekeryayeva oña telefon etip, aqayını qıdırmaq içün añlaşma tizmege istey, dep aytqan eken.
«Saba saat 10:26-da Zekeryayevniñ ömür arqadaşı Emine telefon etti. Ana-babasında musafirlikte edi ve belli olmağan şahıslar aqayını belli olmağan yerge alıp ketti, dep bildirdi. Mesleatlardan soñ oña tevsiyeler berildi. O, 102-ge telefon etip, aqayı hırsızlandı, dep bildirji. FSB, prokuroraturağa (nevbetçi prokuror) da telefon etti. Bazı telefonlar açılmadı, bazıları yañlış yerge telefon etti, dep aytqanlar. Aqayı içün pek qasevetlendi», – dep tarif etti Gemeci.
Bundan evel aq qorçalayıcılar Eski Qırımda 30 yaşında Asan Zekeryayevniñ evinde tintüv keçirildi, dep bildirdi. Bundan soñ erkek belli olmağan yerge alıp ketirildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
