İşğal etilgen Qırımdaki qurğalıq iklimine tesir etmek içün, “Rusiyge tek dua etmege qala, başqa çare yoq”.
Bunı Dmitriy Medvedevniñ avalesini tefsir eterek, Ukraina prezidentiniñ Qırım MC-nde daimiy temsilcisi Boris Babin “5 kanal” efirinde beyan etti.
Rusiyeniñ baş naziri Dmitriy Medvedev sentâbr 10-unace Qırımdaki suv qıtlığı meselesini çezmege ve onı yoq etmege avale etti.
Babinniñ aytqanına köre, Şimal Qırım beketi qapatılğanı içün Qırımda ekologik felâket yoq ve olmaycaq, çünki beket – bu suniy, yapma inşaat.
“Qırımnıñ Şimalinde 1954 senesine qadar boş, tena yer edi, şimdi de yarımada o alına qayta. Mında iqtisadiy felâket olması mümkün, em de olacaq. Qırımnıñ tabiatına tesir etmek içün Rusiyege dua etmek kerek, başqa çare yoq. Şimal Qırım beketine suv sadece ukrain arbiyleri ve ukrain akimiyeti ile kelecek”, - dep beyan etti Boris Babin.
Qırımnıñ yerastı suvları sıñırlı olğanını da qayd etti. Sovet vaqtında da, ondan soñ da, tuzsız suvnı sanayıda büyük ölçülerde qullanmağa yasaq edi.
“Onı bir yerge toplasañ eger, terekler topnen qurıp başlar, tatlı suv olğan yerlerge tuzlı deñiz suvu tolması mümkün. Rusiye Qırımnı işğal etkende, bu vaziyetni pek yahşı añlay edi, ondan sebep - yarımadaki qurğanlıq içün tecavuzcı-memleket mesüliyet taşıy”, - dep qayd etti Babin.
“Qırımnıñ sahrağa çevirilecegi, yazıq ki, şübesiz”, - dep qoştı Babin.
“Rusiye ne yapacağını endi tüşünsin: anda suv keçirsin, suv ağlarını qursın. Bu işke para masraf etsin – ne qadar çoq etse, o qadar yahşı. Rusiye Qırımnı arbiy bazası kibi tuta, tamam bunıñ içün anda suv kerek, yerli sakinler içün degil. Rusiye içün bu gumanitar mesele degil. Rusiye akimiyeti öz halqını adam yerine saymasa, işğal etilgen topraqlarnıñ ise asla tüşünmez. Anda halqqa zarar ketirecek qurğanlıq olsa da, Rusiyeniñ bundan işi yoq”, - ayrıca qayd etti ekspert.
