Eski Qırım sakini Zarema Kulametovağa tayin etilgen 1000 ruble para cezası oktâbrniñ 26-nda ödendi. Bunı «Qırım birdemligi» cemaat birleşmesi Facebook saifesinde bildire.
«Bir biñlik para cezasını ödemege keldik, qabaatımnı bilmeyim, amma Facebooktaki şahsiy saifemde islâm timsallerini paylaşqan ekenim. Qabaatımnı tanımadım, amma mında (mahkeme qararında – QA) tanıdım, dep yazılğan», – dep ayttı Kulametova.
Zarema Kulametovanıñ para cezası 10 rublelik kapiklernen ödendi. Video «Qırım birdemliginiñ» saifesinde paylaşıldı.
Kreml kontrol etken İslâm-Terek rayon mahkemesi Zekkiy Kulametovnıñ ömür arqadaşı Zarema ve qızları Rianağa 1000 ruble (tahminen 410 grivnâ) para cezasını tayin etken edi. Olarnı içtimaiy ağlarda yasaqlanğan timsallerni tarqatmalarında qabaatladılar.
Sentâbrniñ 4-nde saba Eski Qırımda Kulametovlar qorantasınıñ evinde tintüv ötkerildi. Aileniñ üç azası politsiya bölügine alıp ketirildi.
Rusiye uquq qoruyıcıları bunı açıq bir sürette izaatlamadı.
2018 senesi fevral ayında Zarema Kulametova politsiya bölügine çağırılğan edi. Onı politsiya hadimini «aqaretlemesinde» qabaatlağan ediler.
Qabaatlayıcı tarafnıñ malümatına köre, Kulametova oğlu Geray Kulametov tutulğanda politsiya hadimini aqaretlep, ayatını telükege oğratqan edi. Taqiqat, Rusiyeniñ İslâm-Terek rayonı politsiya bölüginiñ yolbaşçı muavini Andrey Rogojin aqaretke oğradı, dep israr etken edi.
2018 senesi aprel ayında İslâm-Terek rayon mahkemesi onı Rusiye ceza kodeksiniñ 319-ıncı maddesine köre qabaatlı tanıp, qadınnı 250 saat şartlı işlerge ve politsiya hadimine 20 biñ ruble (8,2 biñ grivnâ) miqdarında tazminat ödemesine mecbur etti.
Zarema Kulametova qabaatını tanımadı, imayesi mahkeme qararını şikâyet etse de, neticesi olmadı.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan «Hizb ut-Tahrir» teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
