2018 senesi noyabr ayında Qırım yalısında Rusiye FSBsi tarafından zapt etilgen «Nikopol» (P176) ve «Berdânsk» (U175) Ukraina arbiy gemileri, em de «Yañı Qapu» (A947) buksiri soñki bir qaç ay bulunğan Keriçteki «Genmol» gemi durağından ğayıp oldı, dep haber ete Qırım.Aqiqat mühbiri.
Ukraina gemileri belli olmağan yerge avuştırıldı.
Qırım.Aqiqat jurnalistleri Keriç merkezindeki Rusiye yalı qaravulınıñ arbiy bölük limanınıñ fotosını yapıp, iskele divarı yanında maskalav ağı altında bulunğan Ukraina arbiy gemileri olmağanını kördi. Aynı vaqıtta, mında arbiy gemilernen beraber zapt etilgen «Yañı Qapu» ukrain buksiri de bulunğan edi.
Faqat, Qırım.Aqiqat mühbirleri ve şaatlarnıñ bildirgenine köre, iyünniñ 25-nde «Genmol» gemi durağında «Yañı Qapu» buksiri endi yoq.
Rusiye FSBsi sıñır idaresiniñ matbuat hızmeti zapt etilgen Ukraina arbiy gemileri ve buksiriniñ avuştırılğanını açıq-açıq bildirmegen edi.
2018 senesi noyabr ayında zapt etilgen «Nikopol» (P176) ve «Berdânsk» (U175) Ukraina arbiy gemileri, em de «Yañı Qapu» (A947) buksiri Keriç merkezindeki Rusiye FSBsi Sıñır hızmetiniñ arbiy bölüginde «Genmol» gemi durağına avuştırıldı.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
