Qara deñizde zapt etilgen Ukraina deñizcileri Qırımda toplanğan eşyalarnı aldı. Bu aqta qırımtatar faali Riza Asanov dekabrniñ 4-nde haber etti.
«Haber etilgenine köre, balalarımız ketirgenlerimizni aldı. Poçtanen yollanğanlarnı bile alıp oldılar», – dep yazdı Asanov Facebookta.
Qırım.Aqiqat faallernen bağlanıp, tafsilâtlı malümat almağa tırışa.
Qırımtatar faalleri esir alınıp «Lefortovo» SİZOsında tutulğan Ukraina deñiz askerlerine yarımadada toplanğan urba ve aşnı bermek içün dekabrniñ 3-nde Moskvağa barıp keldi.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
