Zapt etilgen ukrain katerleri Keriçniñ uzaq iskelesinde tapıldı (süret toplamı)

“Nikopol” ve “Berdânsk” arbiy katerler. Olarnı limanınıñ içine avuştırdılar.

Daa evel Keriç saytlarınıñ birisinde “Genmol”da ukrain arbiy katerleri yoq olğanını aqqında malümat peyda oldı. Qırım.Aqiqat jurnalistleri Keriçke barıp, Qırım yalısı yanında FSB zapt etken ve sanki ğayıp olğan “Nikopol” ve “Berdânsk” ukrain arbiy katerlerni taptı. Katerler, Keriçte, Rusiye FSB Devlet sıñır hızmeti nezaret etken, “Genmol” akvatoriyasında iskele divarı yanında buluna.

Keriçni sarıp alğan tumanğa baqmadan, Qırım.Aqiqat jurnalistleri ukrain arbiy gemilerniñ süretini çekip oldı. Sürette maskirovka ağınen sarılğan kater nomeriniñ bir parçası körüne.

"Nikopol" ve "Berdânsk" katerleri ve "Yañı Qapu" buksirinin Rusiye sıñır gemileri, Keriç boğazınıñ neytral suvlarında ukrain gemilerine attı ve olarnı zapt etti. ​Bütün ekipaj azalarını tevfiq ettiler.

Ukraina Arbiy deñiz quvetleri bildirgenine köre, noyabr 25-te Rusiye sıñır gemileri, Keriç boğazınıñ neytral suvlarında ukrain gemilerine attı ve olarnı zapt etti. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Bütün arbiylerni Moskovadaki "Lefortovo" apishanesine alıp kettiler.