Link açıqlığı

Saatnıñ esas haberi

Zapt etilgen ukrain deñizcilerniñ davasında tahqiqatçı kim olacağı alâ daa belli degil - Polozov


Advokat Nikolay Polozov

Advokat Nikolay Polozov, zapt etilgen ukrain deñizcilerniñ davasında tahqiqatçı kim olacağı alâ daa belli olmağanını ve cinaiy davanıñ malümatı kimde olğanı bilinmegenini bildirdi. Bu aqta o, dekabr 6-sında Qırım.Aqiqat Radiosınıñ efirinde aytıp berdi.

“Men, SİZO reberligine ve FSB tahqiqat idaresine yollağan arizalarımdan iç birisine alâ daa bir cevap almadım. Men bütün cevap berüv rekvizitlerini qaldırğanıma baqmadan. Davanıñ malümatı qayda bulunğanı ve tahqiqatçı kim olacağı alâ daa belli degil, advokatlarnen ve soy-aqrabanen körüşüv razılığını kim berecegi de bilinmegen”, - dep añlattı Polozov.

Noyabr 25-inde ukrain arbiyleri, olarnıñ Odessadan Mariupolge ketken arbiy katerler taqımına rusiye sıñır hızmetiniñ gemisi Keriç boğazınıñ neytral suvlarında attı ve olarnı zapt etti. Kyivniñ malümatına köre, FSB açqan ateş neticesinde altı Ukraina askeri yaralandı.

Ukraina Arbiy deñiz quvetleri bildirgenine köre, noyabr 25-te Rusiye sıñır gemileri, Keriç boğazınıñ neytral suvlarında ukrain gemilerine attı ve olarnı zapt etti. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Bütün arbiylerni Moskovadaki "Lefortovo" apishanesine alıp kettiler.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen Ukraina deñizcilerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG